غزل في الكية
ما اريد اشوفك بعد لا تتصل بيه
انساني وانسى الهوى ولا تسال اعليه
ورطة التقينه سوا فد يوم بالكيه
اگبالي گاعد چنت واتباوع اعليه
صح اني حلگي حلو وخدودي ورديه
وعيوني كلش خضر چني انگليزيه
البس گصير ودلع والكحله هنديه
واضحك بلايا سبب بس حسن نيه
ومرات اباوع صفح والعب برجليه
شتفسره هذا غزل لو هاي عاديه
لو ادري بيك التقي چا جبت بوشيه
لا تغمز بحاجبك ويانه عبريه
هون عليك انتظر فدوه اصبر شويه
انطيك بوسة حنچ من توگف الكيه
***
گال اني اسمي علي من الوزيريه
بس انت شسمچ يبه گتله اسمي خيريه
نسكن بصوب الكرخ يم الغزاليه
سولفنه بس بلطف والگعده وديه
وصلني للجامعه وحط ايده بيديه
ايذكرني ظل بالوعد اوفيلي يبنيه
مو گلتي بوسه الك من توگف الكيه
گتله انتظر لا تلح والبيك هم بيه
هوايه عدنا وكت خليها بالجيه
وردينه نص الدرب بس عطلت الكيه
***
رحت وشلت جنطتي واطلقت رجليه
ولمن وصلت الجسر خطفت علي كيه
ومن عدها چيت علي ويصيح خيريه
فرغت ال?یه تره نزلوا العبريه
ليش امتحانچ صعب ما بيچ حنيه
بس اني اخذ صفر وانت الچ ميه
يا حلوه وين الوعد مو گلتي بالجيه
انطيني بوسة حنچ ماريد بس هيه
گتله الشمس سلمت ما ظل وكت ليه
واعدتك وبطلت روح اشتكي اعليه
ليش انت مثل العلچ لازگ ولك بيه
جريت اذاني وتبت وادفع الف ديه
لو اظل امشي مشي ما اصعد بكيه
الثلاثاء أبريل 01, 2008 4:39 am